Hvernig voru liðin?
Ég og Steindi vorum saman á móti hobbitunum Sveppa og Pétri 🙂
Til hvaða landa ferðuðust þið og hvað voruð þið lengi?
Ég og Steindi fengum Tæland, Víetnam, Malasíu, Kína, Kambódíu og Maká. Við vorum á ferðalagi í 3 vikur.
Hvað er það klikkaðasta sem þú gerðir í ferðinni?
Ég fór í hæsta teygjustökk heims, sem er ekki nema 265 metrar! Sem er sirka eins og 4 Hallgrímskirkjur. By far það ógeðslegasta sem ég hef gert á ævinni og í fyrsta sinn sem ég actually grenjaði úr hræðslu! Ég grét á leiðinni niður ásamt því að hugsa afhverju ég væri að þessu og fyrir hvern eiginlega??
Hvert var skemmtilegast að koma og af hverju?
Held að ég verði að segja Víetnam. Allir svo kurteisir og hressir og besti matur sem ég hef á ævi minni fengið. Alveg sama hvar þú varst, maturinn var alltaf geggjaður!
Hvernig var að vera með Steinda í liði?
Það er pínu svona eins og að ferðast með John Candy í myndinni Plains, Trains and Automobiles (fyrir þá sem hafa séð hana). Maður leggst í blautt rúm því hann hellti niður. Hann reykir inná herbergi, en við gluggann sem gerir samt ekki rassgat! En annars var gaman að vera með honum í liði. Við náum vel saman í húmor og svo er hann auðvitað bara skemmtilegur drengur. Þetta er oft eins og hjónaband hjá okkur sem þarf að vinna að.
Hvað er öðruvísi við þessa seríu en hinar tvær?
Ég held að það sé Asía eins asnalega og það hljómar. Þá meina ég að það hafa svo margir komið til USA og Evrópu en það verður upplifun fyrir fólk að sjá þessi lönd og ruglið sem við erum í þarna.
Hvaða verkefni eru framundan hjá þér?
Ég þarf að flytja tvisvar núna á þremur mánuðum sem er viðbjóður. En fjölmiðlatengt þá fáum við að vita í lok næstu viku hvort við fáum að skrifa nýja Steypustöð í sumar. Við færum þá í tökur á henni næsta haust. Ég ætla að henda í The Secret og segja bara að það sé næsta verkefni.
Höfundur: Auðunn Blöndal / H Talari
