Við vorum ótrúlega ánægðar með hótelið en við gistum á Millenium Hilton Downtown sem er í um 15 metra göngufjarlægð frá Westfield World Trade Center sem er nýleg verslunarmiðstöð (síðan 2016) þar sem úrval verslana og veitingastaða er mjög gott. Hótelið er staðsett í u.þ.b. 20 mínútna göngufjarlægð frá Soho hverfinu sem er að mínu mati lang skemmtilegasta hverfið á allri Manhattan eyjunni. Í hverfinu er ógrynni af flottum búðum og mjög góðum veitingastöðum. Ég var búin að skoða vel hvar við gætum borðað og verð að segja ykkur frá alveg frábærum stað sem heitir The Butcher’s Daughter en við borðuðum tvisvar á staðnum í ferðinni.
Staðurinn býður upp á morgun- og hádegismat en þar er einnig hægt að borða á kvöldin. Við prófuðum hins vegar bara hádegismatinn hjá þeim sem var frábær. Staðurinn er mjög í anda New york með skandinavískum áhrifum. Stemningin er alveg ótrúlega skemmtileg og hráefnið ferskt og gott. Staðurinn er 100% vegetarian og að mestu leyti vegan og glútenlaus.
Við vorum ekki búnar að plana mikið fyrirfram en ég var þó búin að punkta niður hjá mér hvaða staði mig langaði að prófa að borða á ásamt því hvaða búðir við ætluðum að heimsækja. Þar fyrir utan vorum við mikið á röltinu og nutum þess í botn að upplifa hinn sanna jólaanda sem borgin býður uppá. Jólatréð hjá Rockefeller Center var þó einn af fáum hlutum sem við vorum búnar að ákveða að við yrðum að sjá.
Mig langar að nefna annan veitingastað, By Chloe sem er 100% vegan veitingastaður sem mig hefur lengi langað að prófa en hann er einnig staðsettur í Soho hverfinu og þar settumst við niður eitt hádegið og nutum. Maturinn var mjög góður og staðurinn greinilega vinsæll en þar var þétt setið allan tímann sem við vorum þar.
Á laugardeginum fórum við á Top Of The Rock en þann sama dag byrjaði að snjóa þó nokkuð mikið sem setti smá strik í reikninginn hvað skyggni varðar en þrátt fyrir það var upplifunin mjög góð. Seinnipartinn sama dag röltum við í gegnum ,,Lower East Side“ sem er hverfi nálægt Little Italy og Chinatown og á sér mikla sögu eins og reyndar öll New York. Á einum tímapunkti sem oftar vorum við mæðgur orðnar mjög svangar og vorum í vandræðum með að finna okkur stað til þess að borða á en tilfallandi römbuðum við inn á veitingastaðinn ,,Ja Ja Ja“. Staðurinn er 100% vegan mexíkóskur veitingastaður og með þeim betri sem við höfum borðað á. Við hefðum viljað prófa alla rétti á matseðli en maturinn var frábær í alla staði og andrúmsloftið inná staðnum mjög gott.
Á sunnudeginum var mjög fallegt veður og notuðum við þann morgun áður en við fórum út á flugvöll til að skoða nærumhverfi okkar. Ykkur að segja var þetta yndisleg ferð með mömmu minni sem við eigum vonandi eftir að upplifa aftur þó síðar verði.
Takk fyrir að lesa og þangað til næst, hafið það gott!
